Real Madrid vs Man City highlight: Benzema penalty, Rodrygo two quick goals send Real Madrid to Champions League final

Real Madrid and Liverpool go meet for dis season Champions League final afta di Spanish Champions come from behind to defeat Manchester City 3-1 for Bernabeau and win di tie 6-5 on aggregate.

City, bin tink say dem go qualify for second consecutive all-English Champions League final, but Real comeback shock dem.

Algerian, Riyad Mahrez 73rd minute strike bin look like e go dey enough to send City through but substitute Rodrygo score two late goals to send di tie into extra-time.

Karim Benzema give Madrid di lead from di spot for di first half of extra-time afta Ruben Dias bin don foul di Frenchman inside di area.

Real Madrid victory don see dem set up repeat of di 2018 Champions League final wen Real beat Liverpool 3-1.

Dis defeat go pain Pep Guardiola and im boys as once again dem come close but yet dem dey far to win dia first Champions League trophy.

For City and manager Pep Guardiola now, di Premier League title - go be dia only target as four matches remain.

How di match go

Second half extra-time

106 mins - Real Madrid don restart play. Dis half na im go decide who go play Liverpool for di final on May 28. for Paris, France.

109 mins - Eder Militao don fall down and need attention from di doctors. E be like fatigue don hold am.

Afta a while, di match don restart.

115 mins - Jesus Vallejo and Lucas Vazquez don come on for Militao and Vinicius Jnr.

118 mins - Raheem Sterling dey look to di referee to give am foul afta im fall near Madrid eighteen, Daniele Orsato, di referee wave play on.

120 mins - Grealish dribble im way into Real box come cross but Vazquez block di cross. Di corner reult to nothing as Courtois catch di loose cross.

120+1 mins - We don enta 3 minutes of stoppage time in extra-time.

Full Time - Real Madrid don qualify to play Liverpool for dis season Champions League final.

E finish Real Madrid 3-1 Man City (Real win 6-5 on aggregate).

First half extra-time

91 mins - Man City don restart play from di centre circle. One fan don run enter pitch.

92 mins - Benzema try to side foot im shot in, Ederson spill am but later gada di ball.

93 mins - Penalty to Real Madrid! Ruben Dias slide in late to foul Benzema.

94 mins - Goal! Benzema score from di spot. Real Madrid 3-1 Man City.

99 mins Rodri don come off, Sterling don come on.

101 mins - Man City player Sterling receive yellow card for im tackle on Rodrygo.

104 mins - Dani Ceballos don replace Benzema.

105+2 mins - Fernandinho attempt from di back post no dey on target. Di midfielder feel sy im go reach Diaz header but Courtois punch redirect di ball na im make Fernandinho no connect well wit.

Afta two minutes added time di ref don call for half-time in extra-time.

Real Madrid 3-1 Man City. (Real lead 6-5 on aggregate)

Second half

46 mins - Real Madrid begin di second half and straight from di restart dem create chance wey Vinicius Jnr shoot wide.

Carvajal cross di ball straight to di in-form forward wey fail to direct im shot goalwards.

50 mins - Gabriel Jesus dribble Real defenders to create small space for imsef dwn di flank. Im later shoot but Coutois catch am well.

52 mins - Vinicius dazzle im way into di away team eighteen, im pass give Modric wey no control di ball well. Im shot dey blocked but Ederson wey rush comot to catch am fail to do so, na Laporte boot di ball clear.

58 mins - Di fans inside di Santiago Bernabeau dey urge dia team on as dem need to score if dem wan send di game into extr-time.

61 mins - Vinicius go anoda of dos im runs as im try to outrun Walker, di 21-year-old try to find Benzema but Cancelo clear di ball.

63 mins City defender Kyle walker look like say im don injure. Di player receive medical attention but dey signal say im fit kontinu.

65 mins - Cavarjal foul De Bruyne, referee Daniele Orsato show am yellow card.

68 mins - Real Madrid coach Carlo Ancelotti don send on Rodrygo in place of Kroos.

70 mins - Walker don go down again and dey receive treatment.

Di medics bring stretcher on but Walker limp off by imsef.

72 mins - Zinchenko and Gundogan don come on to replace Walker and De Bruyne.

73 mins - Riyad Mahrez don give City lead for Bernabeau.

Bernado Silva lay good pass to di Algerian wey shoot am first time wit im left foot past Courtois.

Real Madrid 0-1 Man City (3-5 on aggregate).

75 mins - Camavinga and Asension don replace Casemiro and Luka Modric.

78 mins - Substitution Jesus time for dis match don finish, Jack Grealish don enter.

82 mins - Benzema dribble Laporte come shoot on goal, Ederson save am. Di linesman flag don go up for offside, if to say Benzema score e for no count.

84 mins - Yellow card for Militao wey commit imsef into challenge to stop Grealish.

85 mins - Fernandinho don enter di match, im replace di goalscorer Mahrez.

86 mins - Cancelo curl one shot wit im right foot wey be like e go enta goal, Coourtois punch am well.

87 mins - Grealish run down Real goal come shoot shot wey Mendy clear off di line. Soon afterwards di Englishman get anoda chance to increase Man City lead but Courtois save im shot wit im legs.

89 mins - Rodrygo equalise 1-1. Di Brazilian tap in from close range cutback from Benzema.

Real Madrid 1-1 Man City (4-5 on aggregate).

90+1 mins -Goallll. Rodrygo don head Madrid back into di game.

Real Madrid 2-1 Man City (5-5 on aggregate).

90+3 mins - Foden try to play smart as City take one quick freekick just outside real area but di Englishman drag im shot wide.

90+5 mins - Yellow card for Valverde Di midfielder slide into Fernandinho. Tackle wey di ref consider as rash challenge.

Full time - Na extra-time go decide dis one.

First half

1 min - Manchester City don take di first kick of di match.

2 mins - From di kickoff Real Madrid win freekick close to Man City penalty area. City defenders clear di cross from Toni Kroos.

4 mins - Benzema head Carvajal cross over di bar. Dat na di first chance of di match but e no trouble Ederson for City goal.

8 mins - Modric and Laporte receive yellow card afta dem both involve in scuffle.

12 mins - Karim Benzema try im luck again wit first time shot from Valverde cutback. Di shot fly high and over.

16 mins - Kevin De Bruyne test Thibaut Courtois wit long range shot, di Belgian goalie save di shot.

18 mins - Vinicius Jnr receive loose ball inside Man City penalty area, chest am, come shoot di ball ova. Dat na good chance wey Real madrid no capitalise.

20 mins - Bernado Silva! Courtois deny di Portuguese wit point-blank save inside di box.

23 mins - Gabriel Jesus bend one shot just wide of Real Madrid goal.

27 mins - Kroos take one freekick wey bin threaten Ederson for City goal. Di shot take small deflection as e go out for corner.

From di corner, Militao and Walker clash heads wey make di referee stop di match. Di City player dey alright to kontinu.

33 mins - Casemiro foul Phil Foden just near di centre circle. Look like di Brazilian dey in pain, Camavinga don dey warm up.

35 mins - Casemiro dey fit to kontinu. Meanwhile Vinicius want referee to show Walker card as di Brazilian claim say di City defender foul am. Di referee wave play on.

40 mins - Phil Foden shot lead to good save from Courtois wey dive low to punch di shot clear.

43 mins - Benzema tink say im don beat di offside trap as im race onto Modric through pass. Di Frenchman later shoot wide but di linesman flag later go up to signal for offside.

45 mins - We don enta two minutes added time before halftime and Man City don get corner. Real defenders head di ball clear go out for anoda corner wey dem still defend well.

Half-time: Real Madrid 0-0 Man City (City lead 4-3 on aggregate)

Real Madrid vs Man City lineup

Man City XI: Ederson, Cancelo, Walker, Dias, Laporte, Rodri, Bernardo, De Bruyne, Mahrez, Foden, Jesus.

Subs: Steffen, Carson, Ake, Sterling, Gundogan, Grealish, Zinchenko, Fernandinho, Egan-Riley, Palmer, McAtee, Lavia.

Real Madrid XI: Courtois, Carvajal, Militao, Nacho, Mendy, Casemiro, Modric, Kroos, Valverde, Benzema, Vinicius.

Subs: Lunin, Fuidias, Alaba, Vallejo, Asensio, Marcelo, Jovic, Vazquez, Ceballos, Rodrygo, Mariano, Camavinga.